Sommaren er over. Farvel, telt, saltvatn, nakne tær, parkfestivalar, molteplukking og ro, ro til fiskeskjær. Hallo, sutring over lekser, brøling på sidelinjer, sokkejakt, styremøte, EU-kontroll, skriking i trafikken, bustadjakt, språkrøkt og generell uro. Kveldane blir mørkare og mørkare, og folk greier berre ikkje å skrive «potensial». Dei har med andre ord eit visst potensial, eigedomsmeklarane og journalistane og alle andre som skriv «potensiale». Potensialet er stort, ja, men det finst faktisk ingen mellomting. Vi har «ritual», «adverbial», «signal», «areal», «kvartal», «pennal» og «potetskal», sjå, utan E, akkurat som «potensial».

Potensielt kan vi slutte å bruke ordet «potensial», og heller seie at alt er bra nok. 

Positivt

Fleire og fleire meklarar sel bustader der ein får ein mann på kjøpet. Er du heldig, er bustaden i tillegg «arkitekt teikna», «ende rekkehus» eller til og med «del av tomansbustad», det vil seie at det er plass til to hestar der, ikkje berre éin.

Endå betre

Viss du heller vil ha ei dame inkludert i inventaret, får du det. Som det så altfor ofte står i Finn-annonser: «Første man til mølla!»