NY RAVATN-BOK

Verda er ein skandale heiter Agnes Ravatns nye bok, som kjem i midten av denne månaden. Der skriv ho om livet, lukka og eit tilvære på bygda. Etter eit hektisk tiår i hovudstaden tek ho mann og baby med seg frå Frogner og flyttar til den vesle vestlandsbygda Valevåg for å roa ned. På eit forfalle småbruk utan internett, omkransa av skog, fjell og sauer, milevis unna kulturandedammen i hovudstaden, snirklar dagane seg sakte forbi. Kveldane går med til å drikka vin og samtala med den næraste naboen – venen og forfattarkollegaen Einar Økland.

SAMLAGSJUBILEUM

Neste år vert Samlaget 150 år. Det skal feirast, blant anna med å arrangera Nynorsk lesedøgn i skulen. I revidert nasjonalbudsjett fekk forlaget støtte til lesedøgnet, og forlaget vil gå ut med tilbod til alle grunnskular i landet i jubileumsåret.

Neste år kjem dessutan storverket Nynorsk litteraturhistorie, skrive av Jan Inge Sørbø. Og i slutten av april skal det arrangerast stor festkveld i Det Norske Teatret.

LITTERATURDAGAR I VINJE

I slutten av august er det på nytt klart for Litteraturdagane i Vinje i Telemark. Det vert lagt opp til tre dagar som skal vera ei motvekt til alt som er flyktig og forstyrra. På programmet står både Kim Leine, Maria Parr, Einar Økland, Jan Kristoffer Dale, Henrik Mestad, Odd Nordstoga, Herborg Kråkevik, Kristin Sørsdal, Knut Hamre og Benedicte Maurset med fleire.

ottar@dagogtid.no