Kva skal vi ha til middag? Rema 1000s åtte år gamle salskampanje «middag til familien for under hundrelappen» hevdar dette er kvardagens store spørsmål, og eg skal i det minste gje dei rett i at det er eitt gjentakande spørsmål – eit som stadig dukkar opp, som ei forventning, eit håp eller kanskje av og til ei frykt hos den som får han servert, ein kreativ sjanse eller vonlaus gru hjå den som må stå for kokkeleringa.

Men Rema hevdar vidare at konseptet har «gitt det norske folk gode og varierte svar på dette spørsmålet» gjennom åtte år. At noko overlever åtte år i daglegvarebransjen, gjer det nærast per definisjon til ein suksess. Men er det sant? Lat oss sjå litt nærare på kva som skjuler seg bak merkelappen «Middag til familien under 100-lappen».

Sett – men mett?

I vår moderne verd må vi byrje med å spørre kva som er ein familie: Kor billeg eller dyr middagen er, heng jo saman med kor mange som skal verte mette for ein hundrelapp. Produktet vi skal byrje med å sjå på, spesifiserer ikkje på pakningen kor mange porsjoner det inneheld, men sidan Rema 1000 på nettsidene nyttar fire porsjonar i alle oppskriftene sine, går vi ut frå at det gjeld her òg. Produktet er ein lasagne – eller eit «lasagne-kit», altså eit sett. Det har eg jo sett før, men då var det i tørrvarehylla; dette ligg i kjøledisken. Kvifor det?

Jau, fordi her har dei tatt det eitt steg lenger: Både den kvite og den raude sausen er allereie laga. Det er berre å blande, hive i omnen og vipps, ferdig. Så kan ein spørre seg – kvifor ikkje berre blande saus og plater, slik at det berre var å sette forma i omnen? Fører ikkje alle posane stort sett berre til meir plastboss?

Ikkje heilt. At ingrediensane ikkje er blanda, gjev høve til å vere kreativ: Du kan bruke eigne ingredienser og sette ditt eige preg på lasagnen.

Mykje tyder på at du bør det, om du skal servere ein fullverdig middag. Lasagnenen inneheld 1490 kaloriar. Delt på fire vert det 372,5 kalorier per person. Ein vaksen person treng kring 2000 kaloriar per dag, og ein middag bør innehalde minst 5 - 600 kaloriar for å mette. Sjølv om vi tek høgde for at to av dei fire i reknestykket vårt er born og treng litt mindre, får vi det ikkje til å gå opp.

Så kan vi servere brød til, eller altså sette til litt ekstra ost eller grønsaker – ikkje noko problem, vel? Bortsett frå at då er det ikkje lenger middag til familien til ein hundrelapp: Lasagnen kostar i seg sjølv 99 kroner.

Salt, om ikkje anna

Nett dette mettheitsproblemet kan dukke opp fleire gonger om ein bruker Rema 1000 for å spe på middagskreativiteten. I frysedisken finn eg produktet Italiensk-inspirert wokmix med fullkornspasta, kylling, tomat og basilikum – i seg sjølv noko spesielt, sidan pasta har lite i ein wok å gjere, men OK. Prisen er 39 kroner for to porsjoner. Til saman 600 gram og 105 kalorier per 100 gram gjer likevel porsjonsstorleiken nærare middag til éin enn til to. Prisen gjev rett nok høve til å spe på litt – heile 11 kroner er til overs på femtilappen ein halv familie kan verte mette på. Men tilbehøret du vel, bør ikkje vere særleg salt – dei 3,48 gramma med salt som er i pakningen, utgjer over ein tredjedel av saltet ein bør få i seg i løpet av ein dag. Et du heile aleine, er du oppe i over to tredjedelar av tilrådd saltinntak.

Og kva med kvaliteten? Fiskesuppe utan fisk vert ikkje god fiskesuppe ved at ho på baksida av pakningen tipsar om at ein kan sette til fisk, reker eller scampi. Sjølv om det i utgangspunktet er eit pluss at Rema har lam på menyen, veit eg ikkje om tynnskore lammekjøt slakta i oktober 2017 med haldbarheit til april 2019 kjem innanfor – så lenge bør ikkje lam vere i frysaren, særleg ikkje når det er skore tynt. Ein Red Curry Woksaus til 10 kroner høyres billeg ut – men i røynda kan du få same mengde kokosmjølk og Red Curry Paste - som er hovudingrediensane i sausen - til 7,60 kroner på same Rema. Eg trur eg like greitt ordnar familiemiddagen sjølv.

Siri Helle