Filmfjes

Fjeset til den kjente, kinesiske kunstnaren Ai Weiwei høyrer heime på filmsidene denne veka. Den store filmfestivalen i Venezia har byrja. Ein av dei mest interessante filmane på programmet er Human Flow av Weiwei. Han har klipt saman spektakulære bilete av folk på flukt i 23 land. 65 millionar lever no slik. Storfelte prosjekt er stilen uansett kunstsjanger for den populære protestrøysta. Frå filmfeltet kan ein òg nemne dokumentarfilmen Beijing 2003 på 150 timar. Hundre og femti timar der, altså. Ingen trykkfeil.

H.T.

Sjå på nett no

(RiksTV) Haiar har i lang tid hatt eit problem knytt til mediebiletet. Dei er ikkje lodne og lette å få til å sjå søte ut på bilete. Her ligg litt av grunnen til at mange haiartar er alvorleg utrydningstrua. Den drivande dokumentarfilmen Sharkwater (2006) av undervassfotograf Rob Stewart – ikkje Rod – slår eit slag for rolla haiar har i næringskjeda, og avslørar meiningslaus slakt der ein skjer av finnen for å lage dyr suppe og kastar resten til botnen av havet.

H.T.

Tre på topp:

Det manglar ikkje på borgarrettsfilmar frå USA, og bra er det. Her kjem tre du må få med deg:

I Am Not Your Negro (2017) Ja, så sjå til å få med deg denne mens han framleis går på kino, då! Nydeleg dokumentar basert på den uferdige rapporten frå forfattar James Baldwin.

The House I Live In (2012) Om du verkeleg skal setja deg inn i den strukturelle rasediskrimineringa, så sjå denne dokumentaren om narkotikapolitikken i USA.

Mississippi i flammer (1988) Nok ein film basert på sanne hendingar. Men så er ofte røynda vel så dryg og dermed like underhaldande som fiksjonen.

B.A.