FILMFJES

Fjeset til ein av Noregs mest framgangsrike regissørar, Iram Haq, pregar den prestisjefylte filmfestivalen i Toronto denne veka. Hennar nye film Hva vil folk si har hausta rause lovord. Dramaet har utrulege 100 prosent på Rotten Tomatoes, ei side som samlar snitt frå meldingar. Det viktige bransjebladet Variety hyllar hovudrolla til Maria Mozhdah som ei sublim oppdaging og kallar filmen eit stort og sjølvsikkert steg opp frå debuten Jeg er din, som òg hadde premiere i Toronto.

H.T.

SJÅ PÅ NETT NO

(plejmo og RiksTV) Viss ny film med Catherine Deneuve gjev deg eit ustoppeleg trong til å sjå Paraplyene i Cherbourgh (1964) av Jacques Demy igjen, mens du ventar på reprise på næraste filmklubb eller cinematek, er det heilt naturleg. Eg tilrår min favorittmusikal ofte. Vonde tunger hevdar at eg kanskje har ein ørliten romantikar i meg. Det er sjølvsagt falske nyhende. Kven kan stå imot dei friske fargane, den såre musikken og den uendelege, ulukkelege kjærleiken?

H.T.

TRE PÅ TOPP:

Thrillerar om studentar dreiar seg ofte om korleis den rørande, ungdommelege optimismen vert broten ned av fæle handlingar. Som til dømes i desse:

Polytechnique (2009) Denis Villeneuves superskumle skulemassakrefilm er som ein fiksjonsfilm basert på dokumentarfilmen Bowling for Columbine (2002).

Raw (2016) Denne fullstendig utypiske kannibalfilmen med handling lagt til ein fransk veterinærhøgskule, er meir eir ubehageleg enn skummel, eigentleg.

Heathers (1988) Alle som var kule, såg denne, og digga han då han kom ut. Eg var berre passeleg kul, så eg berre likte han.

B.A.