DRAMA/KOMEDIE

REGI: MARTIN PROVOST

Jordmoren
(orig.tittel: Sage femme)

Med: Catherine Frot, Catherine Deneuve

Claire (Frot) er ei jordnær jordmor som blir kontakta av levekvinna Béatrice (Deneuve). Den drikkfeldige dama stakk frå faren til Claire for tretti år sidan utan å ana dei katastrofale konsekvensane. No har ho kreft, og ho vil vera nær dei ho svikta i ei svunnen tid. Claire har eit hjarta av gull, men å takla toskeskapen til den svakt angrande syndaren tærer på.

STORSPEL

Skodespelet til Catherine Frot og Catherine Deneuve står for ein stor del av opplevinga i Jordmoren. Deneuve har vore diva sidan sekstitalet. Namnesøstera Frot har òg ei flott karriere med nesten hundre filmar og heile ti César-nominasjonar. Båe har røynsle i rikt mon. Slik stoltheita over faget skin gjennom for figuren Claire, strålar Frot og Deneuve kvalitet. To dugelege karar som son og friar for Claire gjev dynamikk og drama.

FIN FILM

Regissør Martin Provost kjem med velretta stikk mot eit helsevesen der effektivisering og teknologi trumfar erfaring og medmenneske. Claire er prinsippfast. Ho arbeidar hardt, bur i ein fattig forstad og pleiar parsellhagen. Kontrasten til spelegale Béatrice er i største laget, men dei to skodespelarane får det til å fungere. Stemninga balanserer mellom melodrama og moden refleksjon. Historia pirrar den nyfikne med å sleppe informasjon sakte. Resultatet er ein fin film med flott skodespel og sunt vett.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid