Fleire kunstnarar:

«Papirkunst»

Telemarksgalleriet & Lysbuen, Notodden

2. juni–6. september

Utstillinga viser korleis ti nordiske samtidskunstnarar utforskar og nyttar papir i arbeida sine. Telemarksgalleriet held til på gamle Tinfos papirfabrikk på Notodden, noko som skaper ei særeiga ramme for utstillinga. Kunstnarane er Kåre Tveter, Ørnulf Opdahl, Anne Kari Amstein, Ann Iren Buan, Marie Buskov, Sissel Fredriksen, Gabriella Göransson, Lars Morell, Rebecca Angelica Nordbø og Randi Nygård.

Liv Dysthe Sønderland:

«Recomposing sadness»

Sandnes kunstforening

6. august–23. september

Utstillinga viser akvarellar og trykk av saftige, grøne planter i vekst. Ho tek føre seg korleis livskrafta utan stans endrar form og gir nytt liv. Prosjektet vert interessant nok stilt opp mot prosjektet «Uutholdelige fakta», som tek føre seg strategiar for å handtere destruktive krefter i samfunnet. Så kan ein stille spørsmål om korleis det står til med krinslaupet vårt. Det kan hende at vi bør sjå til naturen.

Magnhild Øen Nordahl:

«Frisbeeperspektivet»

Vestlandsutstillinga 2018

Sogn og Fjordane Kunstmuseum

2. september–28. oktober

I år vert den tradisjonsrike Vestlandsutstillinga ikkje ei mangfelt mønstring som tidlegare år. I staden vert seks separatutstillingar viste på ulike museum og galleri. Tanken er at desse seks skal syne breidda i det som skjer på den vestlandske kunstscena.

Ved Sogn og Fjordane Kunstmuseum syner Magnhild Øen Nordahl ein installasjon som tek utgangspunkt i jordas form og to ekspedisjonar som hadde som mål å undersøkje denne. Den eine ekspedisjonen gjennomførte ho sjølv, og den andre vart utført av den sjølvlærte romrakettbyggjaren og konspirasjonsteoretikaren Mike Hughes frå California. Nordahl interesserer seg for kva føresetnader mennesket har for å skjønne naturvitskaplege sanningar og teknologien vi omgir oss med i kvardagen.

Ragnhild Aamås:

«Flyt»

Vestlandsutstillinga 2018

Kunstmuseet KUBE, Ålesund

24. august–7. oktober

«Flyt» er også del av Vestlandsutstillinga. Her viser Aamås ein lydinstallasjon, skulpturar og digitale kollasjar. Utstillinga er ein kommentar til nasjonalromantikken. Kunstnaren spør kvifor så få av verka tek føre seg temaet utvandring, med tanke på kor mange nordmenn som emigrerte til USA. Kollasjane hennar er laga med utgangspunkt i måleriet «Utvandrere» av Gustav Wentzel (1902). Dette er eit av svært få verk som tok opp temaet emigrasjon, frå denne perioden.

Christian Skredsvig:

«På reise»

Hagan, Chr. Skredsvigs kunstnerhjem, Eggedal

10. juni–30. september

Utstillinga viser måleri av Christian Skredsvig frå den franske rivieraen, Grez, Caen, Roma og Sevilla. Storparten av bileta er lånte inn frå private eigarar og har ikkje vore stilte ut tidlegare. Samstundes kan du nytte høvet til å besøke den uvanleg vakre og velhaldne kunstnarheimen.

Wilhelm Sasnal:

«Engine»

Kistefos-Museet

27. mai–7. oktober

Utstillinga viser filmar og måleri av den kjende polske målaren, teiknaren og filmskaparen Wilhelm Sasnal. Ein får eit breitt innblikk i produksjonen. Biletspråket er inspirert av popkunst. Motiva er flate, forenkla inn til beinet.