Eg fekk det ikkje med meg då The Band-virtuosen Garth Hudson samla nokre av Canadas fremste artistar til å tolke somme av bandets klassiske komposisjonar på Garth Hudson Presents a Canadian Celebration of The Band (2010), men då utgivinga nyleg kom i ny utgåve, gjekk det meg heldigvis ikkje hus forbi. Plata, som har vore vanskeleg å få tak i, byr på to nye spor og eit hefte med ny tekst av Alan Cross og er ein aldri så liten lyttefest for alle som er glade i The Band.

Høgdepunkta er mange. Det kjennest alltid som ei gåve å få høyre røysta til Mary Margaret O’Hara, for det er ikkje så ofte ho syng på plate, og her gjer ho ei nydeleg tolking av «Out of the Blue» med The Sadies. Skikkeleg glad vert eg også av å høyre Peter Katz and the Curious’ versjon av «Acadian Driftwood», og no plateaktuelle Cowboy Junkies gjer ein fin vri på «Clothes Line Saga», den underlege låten Dylan laga saman med The Band.

Favoritten min på plata er kanskje Doug Paisleys «Whispering Pines», ein av dei finaste songane Robbie Robertson har komponert, men aller herlegast er det kanskje å høyre mannen bak det heile sjølv spele på tangentane på desse låtane – ingen andre høyrest ut som Garth Hudson.

Øyvind Vågnes