Biletbok

Kristin Roskifte:

Alle sammen teller

Magikon forlag

Bokstavar og tal er basis i all lærdom. Illustratør og forfattar Kristin Roskifte har tidlegare utforska bokstavane i tre kritikarroste biletbøker. Når ho gjev seg i kast med tala, er det ikkje så mykje for å lære lesaren å telje, som for å vise oss kva som tel.

Ideen er god, og gjennomføringa er kunstnarleg overtydande. Om det er eitt eller tusen menneske på oppslaget, er alle teikna individuelt og for hand. Detaljrike strekteikningar minner om moderne fargeleggingsbøker. Kva kjem til syne om du sjølv legg farge i detaljane? Boka har mange løyndomar på lur.

Siste side ser ut om eit brettspel. I rutene ligg spørsmål og utsnitt frå illustrasjonane, og skal du komme vidare, må du gå tilbake og lese på nytt. Spelet er også ei oppskrift på den litterære samtalen, med opne og lukka spørsmål i alle kategoriar. Nøkkelen til løyndomane ligg i målruta.

I den norske, målstyrte skulen har filosofien framleis liten plass. Den vaksne lesaren som kan tala frå før, lærer noko langt viktigare i Alle sammen teller: Å stille spørsmål som gjev kunnskapen verdi for barnet.

Boka kan lesast på tallause måtar, men bodskapen ligg fast. Menneskeverdet er som talrekkja: uendeleg.

Janne Karin Støylen

Janne Karin Støylen er bonde og litteraturvitar.