– Det er på høg tid at bioteknologilova blir oppdatert, og denne stortingsmeldinga legg opp til fleire småendringar som kan føre til betre og meir ressurseffektiv behandling for norske pasientar. Samtidig tar ikkje regjeringa endeleg stilling til dei mest omstridde spørsmåla, som for eksempel eggdonasjon, seier leiar i Bioteknologirådet, Kristin Halvorsen.

Ole Johan Borge, direktør i Bioteknologirådet, vedgår at spørsmål om bruk av bioteknologi på menneske før fødsel er vanskelege.

– Med tydelege verdispørsmål der partia har ulike synspunkt, er det ikkje lett å skape eining. Førre regjering sleit også med desse spørsmåla.

Borge trur at behovet for befrukta egg til stamcelleforsking blir mindre.

– Stamcelleforskinga er lovande. Bruk av embryo har vorte mindre naudsynt på grunn av alternative metodar. Anten ein bruker stamcellene som finst i pasienten sjølv, eller vanlege celler som ein kan programmere om til stamceller, kan ein få utrulege resultat. 

Oppdaginga av korleis spesialiserte celler kan vere i stand til å programmere seg om til stamceller, får mellom anna den japanske forskaren Shinya Yamanaka æra for. Han fekk nobelprisen i 2012 saman med britiske John B. Gurdon.

Ifølge direktøren, som sjølv har doktorgrad i medisinsk vitskap og stamcelleforsking, kokar restriksjonane ned til den moralske statusen til embryoa og eit ønske om å vere trygg på kva som er etisk forsvarleg.

– Det er i Noreg ikkje lov å skape liv berre for forskingsformål. Det er heller ikkje lov med genmodifisering av embryo. Somme uttrykkjer ønske om at dette skal vere mogleg. I den nye stortingsmeldinga seier regjeringa at det ikkje bør vere ope for det i Noreg.

– Er styresmaktene for restriktive når det gjeld denne typen forsking?

– Det kan eg ikkje svare på. Alle sjukdommar har ulike behandlingsstrategiar, og stamcelleforsking er berre eitt av fleire felt, seier Borge.