MIDT I 1970-ÅRA hoppa den unge Ingvar Ambjørnsen av frå vidaregåande skule i Larvik og kom til Ulvik som elev ved Hagebruksskulen. Frå hybelen han leigde rett ved garden til Olav H. Hauge, kunne Ambjørnsen sjå diktaren stelle epletrea. Den unge mannen, som alt då visste han ville bli forfattar, våga ikkje nærme seg den namngjetne poeten, men det var her Ambjørnsen skreiv debutboka si, Pepsikyss, eit stensilert og illustrert hefte med dikt, ei forteljing og ein teikneserie, som han selde for tre kroner på gata i Bergen.