Dersom ein legg ferien til Albania og til den vesle byen Gjirokastër sør i landet, tre mil frå grensa til Hellas, kan ein besøke Ismail Kadare-huset i gamlebyen, som står på Unescos verdsarvliste frå 2005. Steinhuset er 300 år gammalt og restaurert etter ein brann i 1997. Her voks Albanias største forfattar opp, og huset er sentralt i Dukken, som kom ut på albansk i 2015. Her skildrar han sin eigen oppvekst, forholdet til mora og forholdet til eit Albania han forlét i 1990 til fordel for asyl i Frankrike med bustad i Paris.