Reportasje
Salten i låg sol
BODØ: Alle veit kvar Bodø ligg, for dit kjem ein med fly og ruteskip, bil og jarnbane, men langt frå alle veit at Nordlands fylkeshovudstad ligg i ein region med namnet Salten.
Kystlandskap, Salten.
Alle foto: Håvard Rem
Salten-ferda byrjar i Bodø. Fylkeshovudstaden er knutepunkt. Byen er i praksis endestasjon på Nordlandsbanen. Bodø har stor lufthamn med direkteflygingar til hovudstaden. Byen er ei viktig hamn for kystruta.
I hamna ligg eit flott fuglefjell av eit bibliotek- og konserthus, der sal og scene har utsyn mot himmel og hav, element som på si side speglar seg i dei mastehøge vindauga i Stormen.
Gaukungen
Der førebur dei ei helg med litteraturfestival når eg kjem til Salten ein torsdag i november. Det er tiande året på rad dei arrangerer Det vilde Ord, ein moderne Salten-tradisjon der namnet, med ein liten vri, er henta frå tittelen på ei diktsamling av ein saltværing, Det vilde Kor (1904), av Knut Hamsun (1859–1952) frå Hamarøy i Nord-Salten, der ein finn Hamsunsenteret. Festivalsjef for Hamsundagene på Hamarøy har teke turen frå den eine Salten-festivalen til den andre for å halda opningstalen på Det vilde Ord.
Festivalhelga er ein grei start på Salten-ferda, for til Stormen kjem ei rekkje kunstnarar og forfattarar med røter og/eller bustad i Salten, som Egon Holstad, Morten A. Strøksnes, Eva Salhus Winther og Hugo Aasjord.
Men held ikkje festivalen til i Bodø? Jau, i Bodø i Salten. Men er ikkje byen fylkeshovudstad i Nordland, ved sida av å vera den største byen i Nord-Noreg etter Tromsø? Jau, men Bodø er ein av dei ni kommunane i Salten òg. Salten? Kva og kvar er det? Det er slikt folk ikkje lurar på om du fortel at du er i Telemark eller Gudbrandsdalen, eller i Lofoten eller Helgeland, granneregionar av Salten. Lofoten veit alle kvar ligg.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
