Teknologi
Sjå til Noreg!
«Made in Norway». Den 1700 meter lange og vakre hengjebrua over Langenuen kan verta bygd av lokale krefter med norsk aluminium produsert med norsk vasskraft. Ho vil vera særs miljøvennleg og nærast fri for vedlikehald.
Illustrasjon: Norconsult
I 2003 stod ei rekkje ingeniørar i allvêrsjakker ved Sognefjorden og tok Noregs dyraste avgjerd. Fjorden var mogleg å kryssa. Resten tek det teknologiske imperativ seg av. Det som kan gjerast, vert gjort. Me har alt vore på månen, og vi har laga atombombe.
Ferjefri E39 frå Kristiansand til Trondheim er i ein slik samanheng eit mykje meir vettig prosjekt. Fredeleg og til gagns for Noreg i generasjonar framover. Kostnadene treng me ikkje snakka om, for alle budsjett vert jo sprengde i samferdsleprosjekt, same kor store summar ein gissar på.
Dei driftige og dyktige rogalendingane er alt godt i gang. Med prosjektet Rogfast fjernar ein behovet for ferje mellom Mortavika og Arsvågen. Reisetida mellom Stavanger og Bergen vert 40 minuttar kortare, og heile det sørlege Vestlandet blir knytt saman med gilde vegar til glede for innbyggjarane og det veksande næringslivet.
Rogfast består av ein 26,7 kilometer lang undersjøisk tunnel som på det djupaste er 400 meter under havflata. Tunnelen vil ha to løp for å sikra tryggleiken, og skulle ein få trong til ein pust i bakken undervegs, er det berre å ta turen opp til Kvitsøy. Der kan ein sjå utover havet og på dei gilde mastene som gjorde det mogleg å kommunisera med sjøfolk i svunnen tid.
Det krev lang tid og mykje arbeid å laga ferjefri E39, men den politiske prosessen er endå treigare. Eg fortvilar. Heile prosjektet frå Kristiansand til Trondheim er forventa ferdig omkring 2050. Då er eg over 90 år gamal, skulle eg vera så heldig å leva. Sertifikatet er nok då ein saga blott.
Heldigvis kjem Statens Vegvesen meg og andre utolmodige i møte. Dei har laga strålande videoar som syner korleis det vil verta. Eg har alt køyrt dei fleste bruene og tunnelane virtuelt. Eg har fylgjande melding til komande generasjonar: Det vert fantastisk. Bada i flott neon kan dei susa i fire felt mellom Kristiansand og Trondheim på halve tida samanlikna med i dag. Dei må berre passa seg for dei gamle 2006-modellane som framleis rullar rundt på vegane i framtida.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
