Flott av Fotballforbundet
Fotballpresident Lise Klaveness under ein pressekonferanse på Ullevål stadion.
Foto: Erik Flaaris Johansen / NTB
Saudi-Arabia har fått tildelt fotball-VM i 2034. Det er nedslåande, men på ingen måte uventa. Det internasjonale fotballforbundet har knapt truverde lenger, lèt pengane styra og har late seg begeistra av dei storslegne planane Saudi-Arabia har for verdsmeisterskapen.
Saudi-Arabia har i mange år freista å gjera seg vakre gjennom idretten. Med fotballspelaren Cristiano Ronaldo i spissen lèt fotballspelarar, golfspelarar, Formel 1-køyrarar og ei rekkje andre idrettsutøvarar seg kjøpa og gjev leiarane i landet internasjonal legitimitet og prestisje.
VM-arrangementet vert sikkert bra. Pengar har dei nok av i Saudi-Arabia. Men dei manglar respekt for elementære menneskerettar. Difor er det flott at Norges Fotballforbund (NFF), som einaste forbund, har stått opp mot vedtaket.
I eit tydeleg og klart brev til Fifa-kongressen kom Fotballforbundet med dissens og kritiserte prosessen for at han ikkje i tilstrekkeleg grad ivaretok «prinsippene om ansvarlighet, transparens og objektivitet». Dessutan: «FIFAs egne retningslinjer for menneskerettigheter og aktsomhet er heller ikke godt nok integrert i prosessen».
Noreg kan vera stolt av at vi har eit så uredd og prinsippfast styre i NFF, med fotballpresident Lise Klaveness og generalsekretær Karl-Petter Løken i spissen.
Så kan dei som har planar om å reisa til Saudi-Arabia, lesa litt om menneskerettssituasjonen i landet. Start gjerne med rapportane til Amnesty som dokumenterer vilkårleg fengsling av journalistar og forfattarar, langvarige og urettvise rettssaker og eit system som sikrar arbeidsgjevarane stor makt over migrantarbeidarane.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
