Stå saman mot Trump

For tre år sidan var det mange som ikkje trudde at Russland ville invadera Ukraina. Underteikna òg. Så kyniske kunne dei ikkje vera. Vi tok grundig feil. Komande måndag 24. februar har det alt gått tre år sidan Putin og Russland invaderte nabolandet Ukraina.

For Putin galdt det å utvida Russlands maktområde og å atterreisa Russland som stormakt. Då måtte Ukraina «denazifiserast» og koma under russisk kontroll. Men invasjonen vart mislukka. Ukrainarane klarte mot alle odds å slå styrkane tilbake frå Kyiv.

Men russarane tok kontroll over nye område i aust og har sidan dagstøtt herja på og bomba mål i Ukraina. Overgrepa har vore store. Massakren i Butsja, vilkårleg bombing av sivile mål, tvangsdeportering av born i okkuperte område og øydelegging av kraftverk og vassforsyning som har råka sivilbefolkninga hardt. Svært mange soldatar er skadde og drepne – på begge sider. Putin har òg påført sitt eige folk store tap og lidingar.

Vi kunne gjort langt meir for å hjelpa Ukraina militært og humanitært. Men Nato, Europa og USA har likevel støtta opp om Ukraina. I ein krig som Russland kunne ha avslutta på dagen.

Brått er Donald Trump tilbake og snur opp ned på alt. Ukraina og Europa skal ikkje få delta i fredsforhandlingane. Alt før forhandlingane startar, seier Trump at Ukraina er uaktuell som Nato-medlem. Samstundes prøver USA å skaffa seg kontroll over viktige mineral i Ukraina, og Trump ymtar om at Ukraina sjølve er skuldig i krigen. Det eine avløyser det andre. Det er noko nytt kvar dag.

Nok er nok. Dei europeiske landa kan ikkje lenger stå skulerett for Trumps mange utspel. Heldigvis har vi denne veka sett ein snunad. Etter at Trump onsdag kalla Zelenskyj for ein diktator, kom det endeleg tydelege tilbakemeldingar. Statsminister Jonas Gahr Støre tok klart avstand frå utsegnene, og Erna Solberg kalla dei for russisk propaganda.

Er du abonnent? Logg på for å lese vidare

Digital tilgang – heilt utan binding

Prøv ein månad for kr 49.
Deretter kr 199 per månad. Stopp når du vil.

E-postadressa di

Eg godtek vilkåra

Eller kjøp eit anna abonnement

Er du abonnent? Logg på for å lese vidare