Bok
Ei reise i ragnarok
Med Gullbrikkespillet fullfører Asle Toje ein trilogi som skildrar ei lang reise på kryss og tvers i eit Noreg og Europa i stor endring. Men det er òg ei reise i sinnet, loggføring av ein erkjenningsprosess.
Asle Toje er forskar, forfattar og kommentator. Han er òg medlem i Den Norske Nobelkomite.
Foto: Heiko Junge / NTB
Asle Toje har fagleg tyngd som statsvitar, utanrikspolitisk forskar og medlem av Den Norske Nobelkomite, men skriv med litterært grep og blikk. I lettlesne parti, naturleg fletta inn i teksten, vert lesaren innført i samtidsanalysar som både utfordrar og opplyser ei ålmente som ligg litt etter si eiga tid.
Frå den siste boka kunne nemnast David Goodharts The Road to Somewhere, som forstår framvoksteren av populistisk opprøyr som ein «motreaksjon på liberale overdrivelser», og Toje oppsøker Goodhart og tek oss med inn i dialogen med forfattaren. Men vi får også vitjingar hos skjønnlitterære forfattarar, frå Thomas Manns Trollfjellet til Karl Ove Knausgårds Min kamp, alt lett å lesa, men ikkje overflatisk.
Denne grensekryssinga mellom det vitskaplege og det eksistensielle er sjeldan vare i norsk bokheim. Berre ei utakksam ålmente som ikkje trur på seg sjølv, unnlèt å verdsette slikt.
Rødt, kvitt og blått
Dei tre titlane er velvalde og fortel kva det står om for Toje. Rødt, hvitt og blått (2012) er fargane til trikoloren og syner til den franske revolusjonens ideal om fridom, likskap og brorskap. Det er samstundes fargane i det norske flagget, forma til ein kross.
Det handlar altså om demokratiet i Europa, som er undertittelen på denne fyrste boka i trilogien. Kva skjer når «arbeidarklassa vert trygdeklasse», og når politikarane dannar ei eiga klasse med større nærleik til kollegaer i andre land enn eigne veljarar?
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
