Bok
Makt og absurd teater
Giuliani da Empoli har skrive ein roman om det som går føre seg bak lukka dører i Kreml.
Statsvitaren Giuliani da Empoli debuterer med ein roman som han seier han har skrive for å formidle innsikter som ei statsvitskapleg avhandling ikkje kan uttrykkje.
Foto: Brigitte Baudesson
«Ingen slepp unna sin eigen lagnad, og lagnaden til russarane er at dei er styrte av etterkomarane til Ivan den grufulle», seier hovudpersonen i denne romanen. «Du kan lage kva påskot du vil – proletariatets revolusjon eller liberalismen frie marknad – men resultatet er alltid det same: … at tsarens privilegerte vaktbikkjer hamnar på toppen» (mi omsetjing).
Det er Vadim Baranov som seier dette i Giuliani da Empolas bestseljande roman Le mage du Kremlin. Ein oppdikta person som burde vite kva han snakkar om: I over 20 år var han ein av Vladimir Putins næraste vaktbikkjer. Frå krigen i Tsjetsjenia til annekteringa av Krim var han Putins viktigaste rådgjevar. Han sette i scene Putins forvandling frå fargelaus byråkrat til russisk tsar.
Innsiktsfullt
Empoli har skrive ein elegant og innsiktsfull roman som kom ut i mars 2022, har vunne fleire prisar – mellom anna romanprisen til L’académie française – og har lege på bestseljartoppen i Frankrike i snart eitt år. Ei engelsk omsetjing kjem i oktober og vil venteleg ha stor suksess i den engelskspråklege verda òg. For roman tek opp eit tema som vestlege observatørar gjerne skulle vite meir om: Kva som går føre seg bak lukka dører i Kreml.
Romanen er ein studie av personar og politiske prosessar i krinsen rundt Putin. Han skildrar Russlands politiske kultur. Og – ikkje minst – utøvinga av politisk makt.
Forfattaren er ein ung sveitsar med mastergrad i statsvitskap få Sciences-Po i Paris og med erfaring som rådgjevar for italienske politikarar. Han er òg den drivande krafta bak Volta, ein politisk tenkjetank i Milano, og har skrive fleire bøker om makt og politikk. Dette er den fyrste romanen hans. Han seier sjølv at han har skrive ein roman for å formidla innsikter som ei statsvitskapleg avhandling ikkje kan uttrykkje.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
