Musikk
Musikk med høg eigenverdi
Dragar byr på ny og gammal musikk frå unge felespelarar i Bergen.
Dragegjengen spelar tradisjonsmusikk med innslag av samtidsmusikk.
Foto: Vegard Moe Nilssen
Dragegjengen er 21 born som spelar fele/hardingfele. I og for seg ikkje noko uvanleg med det – folkemusikkrørsla har lenge tatt rekruttering av unge på alvor.
Men det spesielle med Dragegjengen er at det heile starta (i 2015) som eit foreldrestyrt SFO-tilbod ved Krohnengen skole i Bergen. Etter kvart vart det etablert eit fruktbart samarbeid med ungdomslaget Ervingen og Bergen juniorspelemannslag og lærekreftene deira.
Noko anna som er spesielt, er at det ikkje er vaksne folkemusikarar som står bak initiativet, men samtidskomponist og pianist Else Olsen S, som er mest kjend for sitt arbeid med «open form» og preparert piano, mellom anna i tradisjonen etter John Cage.
Mannen hennar, bassist Øyvind Storesund (som mange kjenner frå Kaizers Orchestra, Cloroform og ymse frijazzkonstellasjonar) medverkar òg. Det nyskrivne verket Dragar er ein viktig del av plata, men her er òg enkle tradisjonelle slåttar.
Sjølvsagt høyrer ein at det er born som spelar, men produksjonen som heilskap, der tradisjonsmusikken vert sett saman med element frå samtidsmusikk, gjer at dette framstår som musikk med høg eigenverdi, ikkje berre dokumentasjon av eit pedagogisk opplegg.
CD-en ligg inni ei vakker lita bok utforma av Therese G. Eide, der ein finn interessante tekstar om prosjektet, ei mengd fotografi, og – ikkje minst – intervju med kvart av borna i laget.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
