Livesendingane med countrymusikk frå Grand Ole Opry i Nashville starta på 1920-talet, og fans av programmet tok til å kalla byen for Music City, USA. Men det var ikkje berre kvit countrymusikk i Music City.

Edward Gab Blackman, ein av sjefane i radio WLAC, såg det ingen andre såg: den store uutnytta marknaden i rhythm & blues-musikken som fylte klubbane i det afroamerikanske Nashville etter andre verdskrig. Med krafta frå 50.000 watt kunne han kringkasta over halve Nord-Amerika, heilt nye plater med artistar som gjesta klubbane langs Charlotte Street.

Den mest namngjetne var New Era Club, som blei opna av William Sousa «Sou» Bridgeforth i 1936. Besteforeldra hans var slavar. Dei som høyrde praten til dei kvite deejayane, var overtydde om at dei var svarte.

Musikken i klubben til Sou følgde utviklinga frå rhythm & blues til soul, og husbandet hans blei brukt då WLAC starta dei epokegjerande TV-programma Night Train. På den tida var Jimi Hendrix gitarist i bandet. Du kan sjå og høyra han i full utfalding på YouTube i eit opptak av Buddy & Stacey som syng Motown-klassikaren «Shotgun».

Dette og mykje meir kan du lese om i Night Train to Nashville. The Greatest Untold Story Of Music City. Meisterleg fortald av Paula Blackman, barnebarnet til den same Gab Blackman.

Øyvind Pharo

Øyvind Pharo er litteraturvitar, musikkskribent og DJ.