Jazz / Samtidsmusikk

Sigurd Hole Ensemble:

Extinction Sounds

Torbjørn Snekkestad, saksofon og trompet; Jon Balke, piano; Sara Övinge, fiolin; Bendik Bjørnstad Foss, bratsj; Tanja Orning, cello; Anders Kregnes Hansen; marimba og perkusjon; Sigurd Hole, bass; Veslemøy Narvesen, trommer og perkusjon.
Elvesang

Musikk og politikk heng ofte saman på ulikt vis, men mest indirekte ved at artistar nyttar den kulturelle og moralske kapitalen sin til å støtta ei sak eller hjelpa fram ein politikar. Såkalla programmusikk møter ein sjeldnare, men både Benedicte Maurseths Hárr og Sigurd Holes Roraima og aktuelle Extinction Sounds representerer spanande unnatak. Dei gjer greie for inspirasjonskjeldene sine, men båe greier på overtydande vis å gjere lyduniversa dei tematiserer, gjenkjennelege gjennom instrumenta i ensemblet.

Opptaka til Extinction Sounds er frå urpremieren av verket med same namn frå Tynset kulturhus 21. oktober 2023. Hole set opp to kontrastar som verket spenner over – barndomsminna frå Gammelsætra med insektlydar frå blomeenga, fuglesongen og sauebjøllene, og det ubønhøyrlege faktumet at me er i ferd med å utrydda ein stor del av artsmangfaldet på jorda. Gjennom dei åtte delane verket er sett saman av, får han fram det grufulle dramaet.

Introen «Like An Echo of Ancient Bells», spelt av Balke, «ser attende», medan andre delen, «Whispers of Air And Dust», fungerer som eit frampeik til del tre og fire. Fjerde satsen «Four Rooms» er som eit verk i verket der idyllen og dei mørke skyene vekslar om overtaket. «Patchwork», der strykarane dominerer, er den satsen der Hole kjem nærast ambisjonen om å integrera naturens lydar i verket. Det heile fell til ro med «Remnants of An Old Pastorale». Glitrande!

Lars Mossefinn

Lars Mossefinn er frilans journalist og fast jazzmeldar i Dag og Tid.