Film
Vent og vondt
Magisk sosialrealisme frå Island er rørande, spennande og sjarmerande.
Addi er del av ein gutegjeng som fell utanfor. Ein dag bestemmer han seg for at mobbeofferet Balli skal få bli ein del av gjengen.
Foto: Mer Filmdistribusjon
Balli (Áskell) er ein tynn, spak gut som blir mobba utan nåde. Først ser det ut som han er hovudfiguren i ei bekmørk historie om mobbing og marginalisering på Island. Så kjem Addi (Birgir) til. Det er draumane hans vi følgjer. Addi verkar meir som ein mild mobbar enn som eit offer. Han heng med slåstkjempa Konni (Viktor) og Siggi, som er nedst på rangstigen før Balli blir ferskingen. Alle kjem frå øydelagde heimar.
Sosialsaga
Miljøa som blir skildra, er brutale. Fattigdom, rus, grov vald, utanforskap, mobbing og valdtekt er nøkkelord. Regissør Gu¿mundur Arnar Gu¿mundsson held ikkje igjen på misera. Ei mor går på heroin. Om far ikkje slår, driv han med psykisk terror eller er fråverande eller daud. Stefedrar er verre.
Mor til Addi driv med draumetyding, spåkort og alt anna Addi ser på som overtru. Sjølv er han elendig på skulen, men er godt likt og litt diplomatisk. Gradvis snik draumar seg inn i røynda til Addi også på uventa vis. Smått magiske element er elegante estetisk. Slik skil soga seg frå meir Ken Loach-like skildringar frå dei lågare sosiale laga. Røynda er røff likevel.
Ny vin
Gutane hamnar ofte i konflikt med andre. Dei hakkar på kvarandre òg, men ein finn ekte vennskap i botnen. Til liks med førre filmen til Gu¿mundur, Hjartasteinn, er forholda mellom tenåringsgutar nydeleg skildra. Varme tonar og flott fotografi får fram det vakre trass i skiten realisme.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
