Musikk
Viktig musikkhistorieformidling
Ottar E. Akre var ein av våre mest aktive og allsidige trekkspelarar.
For mange vil lyden av Ottar E. Akre (1896–1992) først og fremst vera knytt til plateinnspelingar med Olav Werner, Ivar Ruste og Jens Book-Jensen. Men han var så mykje meir en akkompagnatør for populære songarar. Han hadde med seg sterk folkemusikkpåverknad frå oppveksten i Rendalen, men vart også notekunnig. Han har spelt til dans, sirkus, restaurantgjester og boksekampar, og var ein periode kombinert kinomaskinist og musikar. Han leia fleire ensemble, var ein høgt skatta pedagog og laga lærebøker i trekkspel.
Men på denne CD-en er det plateinnspelingar med solisten Akre som er i fokus. Dei vart først utgjevne på 78-plater i perioden 1919–1938, dei fleste i Oslo, men nokre av opptaka vart innspelte i New York. I USA turnerte han, spelte i radio og på plater, og studerte jamvel harmonilære og kontrapunkt.
Akre var dermed ein musikar som ikkje berre kan karakteriserast som folkemusikar. Han spelte mykje av den musikken som var etterspurd i samtida, og hadde dessutan ei viss klassisk skolering. Dette er musikk som er spelt inn direkte, utan høve til reparasjonar/klipping, som vart vanleg etter at bandopptakaren kom på marknaden. Nettopp difor er det tydeleg at det er ein trygg og virtuos musikar me høyrer. Musikken på plata er runddansmusikk (mellom anna vals, reinlender og galopp), inkludert eit par eigne komposisjonar.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
