Seks år etter at pianist Chick Corea feira 70-årsfesten sin i vekevis på klubben Blue Note i New York, er eit utval opptak samla i ein plateboks, The Musician (Concord/Border), ei markant markering av ein av jazzmusikkens mest sentrale musikarar i etterkrigstida, og ikkje minst av fleire av dei viktige samarbeida han har vore involvert i opp gjennom tiåra.

Corea, som vitja Kongsberg Jazz for eit par dagar sidan, figurerte i heile ti ulike bandkonstellasjonar på Blue Note i 2011, og det er ikkje lett å vite kva ein skal peike på i ei slik rik utgiving. På The Musician har ein fått plass til forbløffande mykje på dei nesten fire timane lyttefesten varer. Eg får nemne eit par eigne favorittar: «I Hear A Rhapsody», med det som no er Chick Corea Trio, med Brian Blade på trommer og Christian McBride på bass, er ei sann glede. Det same er «Overture» der Harlem String Quartet får følgje av Gary Burton på vibrafon i eit sprettent stykke kammerjazz.

Alle som lyttar til Corea, vil finne noko her. For dei som ikkje kjenner han, opnar The Musician fleire dører inn til det som er eit eige, variert musikalsk landskap. I september vender Corea tilbake til Blue Note for ei konsertrekkje med Steve Gadd Band.

Øyvind Vågnes