Folkemusikk

Helga Myhr:

Natten veller seg ut

Motvind Records

Dette er den første soloplata til hardingfelespelaren og kvedaren Helga Myhr. Frå før vil mange kjenna henne frå Kvedarkvintetten. Men her står ho fram åleine, i veksling mellom finsleg framførte viser og religiøse folketonar og meir eksperimenterande instrumentalparti der ho, tydeleg inspirert av minimalisme og annan samtidsmusikk, byr på overtonebaserte klangflater og rytmiske slag mot gripebrettet. Dessutan syng ho samstundes som ho spelar fele. Ofte smeltar dette veldig godt saman, men av og til merkar ein at spelet spriker litt i forhold til stemninga i songtekstane. Men likevel: Det er oppløftande at nokon vidarefører denne framføringspraksisen.

Fornying

Ho er ikkje berre forvaltar av tradisjonell song, frå heimtraktene i Hallingdal, men representerer òg ein type fornying av slåttemusikken der mellom anna Nils Økland, Ole Henrik Moe, Erlend Apneseth, Anne Hytta, Rasmus Kjorstad og Hans P. Kjorstad har tilført mykje. Sistnemnde er òg mannen bak det relativt nystarta plateselskapet Motvind Records. Dei tidlegare utgjevingane har vore dominerte av improvisasjonsmusikk, noko som òg finst på denne plata. Men samstundes lovar selskapet nye utgjevingar i same lei, i og med at denne plata er den første i serien «Perspektiv på norsk folkemusikk no. 1».

Himmel og helvete

Medan mange av dei yngre folkemusikarane har søkt inspirasjon i nyare svenske, gjerne rytmisk orienterte samspelsformer og ulike typar populærmusikk, søker Helga Myhr seg mot dei meir kontemplative uttrykka innan folkemusikken. Særleg kjem dette til uttrykk gjennom dei religiøse folketonane med tekstar som spring ut av haugianismens verdsbilete, der helvetesangst og himmellengt er to sider av same sak. Kontrasten mellom ljos og mørke kjem òg til uttrykk musikalsk i samspelet og kontrastane mellom den klåre og avspente songstemma og det meir komplekse og tidvis intense felespelet.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.