Lytt til artikkelen:

Samtidsmusikk

Øyvind Torvund:

The Exotica Album

BIT20 ENSEMBLE, TROND MADSEN (DIR.), KJETIL MØSTER (TENORSAX), JØRGEN TRÆEN (MODULAR SYNTH) Hubro

Noko som kjenneteiknar komposisjonane til Øyvind Torvund (f. 1976), er kombinasjonen av konvensjonelt strukturert og notert samtidsmusikk med overraskande element henta frå andre stilartar som rock og underhaldningsmusikk. Eller han trekker inn element frå lydverda i eldre elektroniske spel og norsk slåttemusikk, som i Willibald Motor Landscape.

Denne gongen lèt han det akustisk baserte samtidsensemblet BIT20 møta improvisatorane Jørgen Træen, som står for det elektroniske innslaget i verket, og Kjetil Møster som – i motsetnad til sin meir typiske kombinasjon av moderne jazz og rocka energi – slår til med langsame, smektande melodilinjer.

Fuglesong

Frå tid til anna har vestlege komponistar late seg inspirera av «eksotisk» musikk. Det gjeld både romantikarar, impresjonistar og modernistar. Men den forma for eksotika Torvund spelar på her, er ei grein av underhaldningsmusikken som vart populær i USA i 50- og 60-åra, med komponistar som Les Baxter og Martin Denny i spissen. Det som kjenneteikna stilen, var kombinasjonen av strykeorkester og storband med «eksotiske» instrument (særleg slagverk) frå stillehavsområdet og Orienten. I tillegg førekom imitasjonar av naturlydar (særleg fuglesong) som skulle skapa ein illusjon av jungel og tropelandskap. I 90-åra vart stilen revitalisert som ein del av fenomenet «loungemusikk».

Men Torvund nøyer seg ikkje med å resirkulera ein allereie resirkulert eksotisme. Han inkluderer også element som illuderer den tidlege elektroniske musikken (t.d. Stockhausen).

Fruktcoctail

Å lesa om denne merkverdige samanblandinga av den lettaste «light music», naturlydar, streng samtidsmusikk og improvisert elektronikk og støy kan lett gje inntrykk av ein musikalsk fruktcocktail av det meir tilfeldige slaget, men det som slår ein etter å ha høyrt dette, er at alt heng nøye saman. Satsane, som varer mellom halvtanna og fem minutt, er stramt strukturerte, og dei musikalske ideane står tydeleg fram utan å verta tværa ut.

Torvund har atter vist at han er ein av våre mest særprega samtidskomponistar.

Sigbjørn Apeland

Sigbjørn Apeland musikar, musikkvitar og fast musikkmeldar i Dag og Tid.