Menneskelege skjold

I leiaren i Dag og Tid 7. februar skreiv eg at «Hamas har nytta folket som menneskelege skjold» i krigen mot Israel. Arnt L. Grav hevdar 14. februar at bruken av omgrepet «menneskelege skjold» er misvisande.

Eg meiner framleis at omtalen av Hamas' militærstrategi står seg. FN og ei rekkje menneskerettsorganisasjonar har dokumentert at Hamas ved fleire tilfelle har plassert våpenlager, utskytingsrampar og kommandosenter nær eller i sivile bygg, som sjukehus, skular og bustadblokker. Det er òg dokumentert at nokre av utgangane frå det omfattande tunnelsystemet til Hamas endar i sivile bygg og område.

Ein slik praksis er i strid med krigens folkerett og må kunna omtalast som bruk av menneskelege skjold. Det er grunn til å tru at Hamas reknar med at Israel vil ta omsyn til moglege sivile tap ved (mot)angrep. Slik vert sivile eit skjold for Hamas.

Israels krig på Gaza må fordømast. Ikkje minst av di eit brot på krigens folkerett ikkje rettferdiggjer nye krigsbrotsverk. Krigen har vore katastrofal og ført til store tap og lidingar for sivilbefolkninga på Gaza. 

Samstundes må ein fordøma Hamas og dei katastrofale ugjerningane dei har stått for. Hamas har vore ei ulukke for det palestinske folket på Gaza.

Er du abonnent? Logg på for å lese vidare

Digital tilgang – heilt utan binding

Prøv ein månad for kr 49.
Deretter kr 199 per månad. Stopp når du vil.

E-postadressa di

Eg godtek vilkåra

Eller kjøp eit anna abonnement

Er du abonnent? Logg på for å lese vidare