Fylkesreforma

Lars S. Vikør

Den nye fylkesreforma har fått mykje og rettkommen kritikk, både for sjølve samanslåingane og for nokre av dei mest hjelpelause namna politikarane har forsynt dei nye fylka med. Her vil eg peike på ein mogleg positiv konsekvens av desse omkalfatringane.

Det er ein ganske irriterande tendens i offentlege samanhengar, ikkje minst i NRK, at ein oppfattar fylka som dei einaste einingane i den norske geografien når ein skal opplyse om kor ein bestemt stad ligg, heimfeste staden, som vi gjerne kallar det. Det heiter da Vinstra i Oppland, Ål i Buskerud, Ulvik i Hordaland, Førde i Sogn og Fjordane, Volda i Møre og Romsdal. Dette burde vere unødvendig i desse tilfella, sidan desse stadene er såpass store og velkjente at folk vel stort sett veit kor dei er, i alle fall dersom dei kan geografien godt nok til å plassere alle fylka. Men det finst mange bygder som ikkje alltid er så kjent for alle utanfor det aktuelle distriktet, og da kan heimfesting vere på sin plass: Sollia i Hedmark, Uvdal i Buskerud, Høyland i Rogaland, Innvik i Sogn og Fjordane, Aure i Møre og Romsdal.

Men korleis blir det no? Skal det heite Sollia i Innlandet, Vinstra i Innlandet, Ål i Viken, Uvdal i Viken, Ulvik i Vestland, Førde i Vestland, Innvik i Vestland? Høyland blir sjølvsagt verande i Rogaland, og Volda og Aure i Møre og Romsdal, i alle fall til så lenge.

Dette blir så upresist at desse heimfestingane blir ubrukelege, særleg for dei mindre stadene. Da har vi eit godt alternativ, som NRK og andre bør innarbeide: Desse stadene har meir presise heimfestingar, som dei har vore kjent for i hundrevis av år, nemleg dei tradisjonelle landskapsnamna. Landskapa er faste einingar i det norske geografien, med røter tilbake til mellomalder og vikingtid og lenger bakover, og er i full bruk i dag. Det er også dei folk identifiserer seg med, i mange tilfelle langt meir enn med fylka, og dei blir ikkje endra eller fjerna frå medvettet til folk gjennom byråkratiske vedtak. Derfor bør heimfestingar av norske bygder, bygdebyar og andre lokalsamfunn no førast tilbake til den gamle praksisen. Det bør heite Sollia i Østerdalen, Vinstra i Gudbrandsdalen, Ål i Hallingdal, Uvdal i Numedal, Høyland på Jæren, Ulvik i Hardanger, Førde i Sunnfjord, Innvik i Nordfjord, Volda på Sunnmøre, Aure på Nordmøre. Slik det eigentleg alltid har heitt.