Politikk
Den mangelfulle førebuinga
Beredskapsarbeidet i Noreg er for fragmentert i leiing og planlegging, og vi er for dårlege på samarbeid og til å tenkje på tvers av sektorar, seier tidlegare forsvarssjef Harald Sunde.
Endringane i den tryggingspolitiske situasjonen er ei utfordring for samfunnstryggleiken også her i landet, som til dømes her på Melkøya utenfor Hammerfest, der Equinor har bygd eit anlegg for mottak og prosessering av naturgass frå Snøhvitfeltet i Barentshavet via ein 145 kilometer lang gassrørleidning.
Foto: Fredrik Varfjell / NTB
Forsvarskommisjonsleiar Knut Storberget skapte overskrifter då han for ein dryg månad sidan erklærte dagens forsvarspolitikk for direkte uansvarleg og tilrådde ei dobling av forsvarsbudsjetta dei neste ti åra. Førre veke kunne tidlegare forsvarssjef Harald Sunde leggje til at det er like omfattande manglar i den generelle beredskapen i samfunnet.
Totalberedskapskommisjonen, som Sunde har leidd, meiner det trengst eit taktskifte og store endringar i måten vi tenkjer, planlegg, organiserer og jobbar med samfunnstryggleik og beredskap på: Beredskap må inn i læreplanane i skulen; det bør arrangerast nasjonale og regionale kurs om totalforsvar, samfunnstryggleik og beredskap for leiarar i organisasjonar og næringsliv; innbyggjarane må ta større ansvar for eigen beredskap; planlegginga, leiinga og samordninga av beredskapsarbeid må styrkjast; vi må evne å handtere samansette trugsmål eller såkalla hybride åtak betre; næringslivet må inkluderast i beredskapsstrukturane i langt større grad; vi må tryggje forsyninga av mat, legemiddel, kraft og andre essensielle varer betre og på eit anna vis enn i dag.
Under framlegginga av rapporten sa Sunde endåtil at føresetnaden om opne, globale forsyningsliner, som vi i stor grad har basert oss på dei siste tiåra, ikkje lenger kan leggjast til grunn for beredskapsplanlegginga.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
