Kommentar
Dom over eit korrupsjonssystem
Sjokkbylgjene rullar over Frankrike, som kranglar vilt om fylgjene.
«Institusjonane garanterer regjeringa eit folk fritt for moralsk korrupsjon, og folket og borgarane ei ukorrupt regjering.» Opphavsmannen til sitatet var Louis Antoine de Saint-Just, korrupsjonsjeger under Terroren i 1793. «Dødsengelen» sende likevel for mange til giljotinen; iveren gjorde at han sjølv mista hovudet, 26 år gammal.
Lova om politisk korrupsjon kom i 1992, i 2004 brigda til å krevje eigen dom om tap av rett til å veljast. Sitatet frå Saint-Just vart iherdig brukt før og etter at lova kom, og ikkje minst av 24 år gamle Marine Le Pen, som sa seg hjarteleg nøgd med lova. Ho vart politikar med løfte om å knuse korrupsjonen. Alt i seks år hadde ho vore aktiv i Nasjonalfronten. No er ho ikkje like glad for lova som ho var den gongen, men ho seier seg forfylgd. Eller – som ein meddømd sa: «Jesus Kristus vart også dømd. Han var like uskuldig, han.»
Korrupsjon
Marine hadde læretid i regionalpolitikken frå 2004, i EU-parlamentet frå same året til 2017. Det året kom ho inn i Nasjonalforsamlinga og tapte presidentvalet mot Emmanuel Macron. I tida 2004–2016, perioden retten har granska, skapte ho det domsfråsegna frå 31. mars kallar «eit system for korrupsjon», ved hjelp av 23 innvigde medarbeidarar og eit ukjent tal medlauparar.
Nasjonal samling (Rassemblement National, RN) satsa etter initiativ av Marine på opplæring av nye kadrar til lokale ombod. Det gjekk fyrst tregt; gamle Jean-Marie Le Pen var for glad i marsjering med flaggborger i gatene og svulstige talar, forutan dryge fråsegner om jødar, krigen og Algerie. Men Marine fekk system i organisasjonsarbeidet over heile landet – både på eine og hitt viset, skulle det syne seg.
Midlar trongst til partilokale, valmateriell, funksjonærlønningar, gåver og mutingar. Marine budde då også på den mest fasjonable parisiske vestkant, Sant-Cloud, og hadde trong for å halde oppe ein viss livsstil, ikkje minst i omgang med mediemagnaten Vincent Bolloré, som gav all mogleg plass til ytre høgre i fjernsynskanalen CNews.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
