Innsida
Norske matskattar nr. 90: Håvard Werkland
Håvard Werkland og laget hans vann prisen for beste fiskerett.
Tom Haga
Innsida rundar 90 matskattar med endeleg å ha ein kokk som ein av matskattane våre. Og det er litt av ein kokk. Håvard Werkland frå Kyrksæterøra var nyleg Noregs kandidat i den gjævaste av kokkekonkurransane: Bocuse d’Or i Lyon. Håvard vart nummer fire og fekk prisen for beste fiskerett.
Bocuse d’Or er ein konkurranse der me har hevda oss svært bra sidan Arne Brimi var den fyrste norske deltakaren i 1987. Etter det har Noreg hatt fem verdsmeistrar: Bent Stiansen, Terje Ness, Charles Tjessem, Geir Skeie og Ørjan Johannessen. Dei fire siste frå Vestlandet, tilfeldigvis.
Arbeidet med å få fram slike internasjonale prestasjonar er eit dugnadsarbeid i stiftinga Norsk Gastronomi.
Håvard Werkland har vore i toppsjiktet lenge. Han var mellom anna commis (assistenten) til sylvvinnar Christopher Davidsen i 2017. Når han no har kome heim att, finn du han på stjernerestauranten Speilsalen i Hotel Britannia i Trondheim.
Frå maten han serverte til dommarane i Frankrike, vil Innsida lyfta fram eit grønt meisterstykke som fekk mykje merksemd, og som kanskje kan få oss til å nytta endå meir frå det grøne til lekre rettar. Håvards grønkålravioli med sopp, erter og laukblomar kan få nokon kvar til å gjera litt meir med grønsaker og kål. Viss du i tillegg lagar litt klara rådyrsuppe med sochang-te, så har du ein fabelaktig rett.
Håvard sin variasjon over selleri pynta med estragon og norsk trøffeltang tek Innsida òg med, utan at redaksjonen har nokon som helst tips om korleis det skal lagast. Målet i matspalta denne gongen har ikkje vore å visa lesarane korleis dei sjølve kan laga matskattane me presenterer, men å få fram kor høgt nivå det kan vera på norsk mat.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
