Norske matskattar nr. 69: kalv frå Folkedal
I Folkedal, ikkje langt frå Granvin, inst i dalen ligg Larsastovo og garden til Astrid og Lars Ingvald Folkedal. Dei driv med konvensjonell mjølkeproduksjon og økologisk produksjon av kalv. Kalv som både har svært god plass i det store fjøset Lars Ingvald har bygd, og som fartar fritt i fjellheimen heilt til snøen kjem.
Den smakfulle kalven har vorte ein attraksjon i hardangertraktene. Han vert mellom anna frakta med elektrisk bil til Kvanndal ferjekai, ført over fjorden med elferje og rulla med trillebår inn på kjøkenet til Jon Aga på Utne Hotell. Meir miljøvenleg kjøt skal ein nok leita ei stund etter, sidan dei attpåtil har eige gardsslakteri.
Mange tek òg turen inn i dalen for å handla hjå bonden direkte. Det kan Innsida trygt gå god for. Utvalet er variert frå hamburgar av kalv til ekstra gode stykkingsdelar som culotte og nyretipp.
Er du på jakt etter ein skikkeleg bygning, er Lars Ingvald ein mann du bør snakka med. Han set opp små og store fjøs, bygd etter gamle grindbryggtradisjonar. Bygningane er solide og gir god lufting, enten det er til storfe eller som garasje.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
