Mat
Soppbonanza
Toast med krema kantarell, fåresopp, grønkål og gruyére.
Foto: Dagfinn Nordbø
Det er ikkje måte på sopp no. Det er sopp overalt. To mann frå den lokale baren min gjekk ut i skogen og plukka 15 kilo på to timar. Dei klarte ikkje å bere meir. I sosiale medium er det så gult at du lurer på om det er noko feil med fargane på dataskjermen. Ein vert nesten gul på fingrane av å skrolle seg gjennom alle dei bognande korgene og bøttene.
Naturen er gåvmild etter så mykje regn. Ikkje berre det – eg er freista til å tru at han gjer narr av oss, for kva skal vi bruke all soppen til? Mengdene er jo av så bibelske dimensjonar at folk kan tette hyttetaket med kantarell. Murar du peis eller støttemur, kan du halvblande mørtelen med fåresopp og spare ein bråte med pengar.
Det beste er likevel å bruke soppen til matauk. Ein sopptørkar er ikkje kostbar, for nokre hundrelappar får du ein heilt brukbar ein. Har du ikkje plass til enda eit elektrisk remedium, kan du tørke soppen på anna vis: Legg han utover på matpapir (inntil fire brett om gongen) i steikeomnen. Sett temperaturen til 40 gradar og dytt ei tresleiv i døra så fukta kjem ut.
Lat så dette stå eit par døgn og legg soppen på glas. Når du har tørka sopp i hus, kan han brukast i stuing og herlege gryter gjennom heile vinteren. Spesielt steinsopp gir særs god og smakfull kraft når du dehydrerer han. Tøm kokande vatn over soppen og la det stå ein tjue minutts tid. Så er soppen klar til bruk, men du kan også legge tørka sopp direkte i gryta, til dømes når du langkokar høgrygg med lauk og raudvin i boef bourgignon.
Tørka sopp kan du lage soppsalt av: Prøv med halvparten av kvar av maldonsalt og tørka steinsopp i kaffikverna. Ei anna magisk sak du kan gjere med tørka steinsopp, er å male han fint i kaffikverna. Så brukar du det finmåla resultatet, til dømes ei matskei, som smakssettar i saus eller suppe.
Dehydrerer du den tørka soppen, er steinsoppkrafta uvurderleg i supper og sausar. Kantarellkraft er også fine saker. Hugs – uansett type sopp – å sile krafta godt av i fint dørslag, tesil eller klede, så det ikkje kjem sand og boss med. Soppen kjem jo frå skogbotnen.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
