Flåtebesøket
Den tyske okkupasjonsmakta bygde ei festning på Søre Vignes på Finnøy.
Dei fleste lokalsamfunn lever sitt stillferdige liv, generasjon etter generasjon, tiår etter tiår. Å endre etablerte lokalsamfunn, politisk, teknologisk og kulturelt, kan ta lang tid.
Her har historia god tid. Men av og til kjem den store verda farande og endrar alt. Og då har historia det travelt. Og då legg ho etter seg ruinar av det som var, lokalsamfunn som ikkje overlevde møtet med den store verda. Berre minna er att, og gravande arkeologar.
Enkelte lokalsamfunn reiser seg att, som Telavåg. Andre blir berre borte.
Den store verda fløymde inn over heimøya mi, Finnøy, sommaren 1940. Den tyske okkupasjonsmakta bygde ei festning der, med alt som til høyrer, kanonar, fjellholer, brakker og soldatar. Ein bonde måtte gje frå seg garden sin. Dette måtte lokalsamfunnet finne seg i og handtere så godt det lét seg gjere.
Så var krigen slutt, og den store verda kom til Finnøy med eit anna mannskap. Engelske offiserar, med stramme uniformer og fine hovudplagg kom med ein engelsk jagar til øya for å overta festninga. Og det vesle lokalsamfunnet måtte handtere denne nye store verda som hadde lagt til kai ved handelslaget. Bygda vart stasa opp, med store mengder bjørkelauv og flagg. Det var vår og fred.
Men korleis skulle dei fine gjestene få mat? Det fanst ikkje kafear og hotell på Finnøy. Det vart vedteke at dei skulle ete middag heime hos oss. Hovudargumentet var at far hadde vore fire år i Amerika og kunne engelsk.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
