Bok
O’hoi!
I sjangeren «skipsreiarroman» har Henrik H. Langeland levert eit svært medrivande bidrag.
Henrik H. Langeland har skrive både romanar og sakprosa etter debuten i 2003.
Foto: Svein Finneide
Det er ikkje berre berre å kome heim etter skipsreiarutdanning i utlandet, torpedering, nesten-drukning og eit opphald på sanatorium med tuberkulose. Skipsreiarsonen Herman Lauritzen frå Tønsberg får overta roret i familiebedrifta på 18-årsdagen, men før han kan ta over i praksis, må han sendast ut på kunnskapssanking. Etter tre år skal han kome tilbake og få byrje den regulerte ferda mot sjefsstolen.
Ny kurs
Det er berre det at med første verdskrigen stormande ute i verda, og med andre komplikasjonar i sving, tar det ni år før Herman vender heim. Då finn han familiegodset i forfall, personlege relasjonar og maktforhold forskovne og inngåtte avtalar brotne. Som han sjølv seier det: «Svik og dolkestøt på alle hold». Frå dette sjokkerande utgangspunktet gjer Herman sitt beste for å få drifta på rett kjøl igjen og stakar ut ny kurs med shippingerfaringa han har frå utlandet. Faren har vore pioner i overgangen frå segl til damp, sonen har festa blikket på overgangen frå damp til diesel.
Ny kurs skal det vise seg å bli i personlege tilhøve òg – direkte tam kan Herman ikkje seiast å vere, utan at eg skal gå nærmare inn på det. Spenninga i denne medrivande romanen ligg nemleg i Hermans utvikling: Kva finn han på no? Og no, då? Kva i all verda!
I tillegg er det ei spennande tid Henrik H. Langeland tar for seg i forteljinga, som er inspirert av historia til ein av landets viktigaste skipsreiarfamiliar på 1900-talet. Tittelen Makten og æren speler på Nordahl Griegs Vår ære og vår makt, og viser, som Griegs teaterstykke, konflikten mellom ein reiarstand som spekulerte i assuranseinnhåving, og den framveksande arbeidarrørsla.
Friskt og vakkert
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
