Musikk
Den nakne stemma
The Eagle of my Heart er eit dristig prosjekt som landar trygt.
Den iranske songaren Marjan Vahdat har i ei årrekkje levd i eksil i Noreg, og har, i tillegg til konsertverksemd, ein omfattande plateproduksjon bak seg – gjerne i samarbeid med systera Mahsa Vahdat.
Nå bur systrene i California, men det er Erik Hillestad og Kirkelig Kulturverksted som står bak denne produksjonen.
Tidlegare har Vahdat samarbeidd med ei rekkje musikarar, både iranske og norske, men her er ho heilt åleine med røysta si. Einaste avvika frå dette er varsam bruk av romklang og ekko, nokre arkivopptak (mellom andre med eldre slektningar) og songaren Ruth Wilhelmine Meyer som er innom på ein liten visitt.
Vahdat har ei fyldig røyst, ho er ikkje redd for å bruka vibrato, og ho kan vera svært intens i uttrykket. Men samstundes kan ho syngja mildare og mjukare enn dei fleste. Og det er nettopp denne store dynamiske spennvidda som karakteriserer syngjemåten hennar. Men dramatikken i uttrykket kjennest likevel ikkje som nokon musikalsk berg-og-dal-bane, fordi Vahdat har ein tryggleik som gjer at dette alltid verkar truverdig.
Dei fleste melodiane er komponerte av utøvaren, sjølv om inspirasjon og stil er henta frå tradisjonsmusikken.
Tekstane spenner frå klassisk iransk poesi til samtidspoesi. Sjølv om dette er eit språk mange av oss ikkje skjønar, er det likevel gjevande å lyda på dette. Det kan liknast med å ha hugnad av å sjå vakker natur sjølv om ein veit lite om geologi og botanikk.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
