Bok

Det vonde i historia

I etterordet til den nye roman Tilintetgjøre hintar Michel Houellebecq om at det kan vere hans siste. Det er inga uvanleg melding frå aldrande suksessforfattarar, men noko ein lyt ta med ei klype salt.

Michel Houllebecq vert rekna som ein av dei viktigaste samtidsforfattarane. Han kombinerer samfunnskritikk med eksistensielle spørsmål.
Michel Houllebecq vert rekna som ein av dei viktigaste samtidsforfattarane. Han kombinerer samfunnskritikk med eksistensielle spørsmål.
Publisert

Likevel kan ein tru at Houellebecq har skrive Tilintetgjøre med tanke på å runde av forfattarskapen sin, for denne romanen femnar om alle dei viktigaste temaa hans: den vestlege sivilisasjonens forfall, mangelen på idémessig kjerne i moderniteten, slutten på seksualiteten og kjærleiken, pengegriskleik som einaste drivkraft i vår tid, det umenneskelege i nyare teknologi og så bortetter.

Eg vil ikkje i denne omtala freiste å gje att handlinga i boka, for Tilintetgjøre er ein av Houellebecqs lengste og rikaste romanar. Dei over seks hundre sidene fortel ei brei moderne familiehistorie som gir lesaren høve til å gjere seg mange tankar om kjærleik og alderdom, sjukdom og død.

Ein kunne sjå desse temaa, som vert vekte opp av familiehistoria og tek det meste av plassen, som viktigast, særleg sidan dei er meir inngåande og empatisk skildra enn ofte elles i forfattarskapen. Likevel vil eg heller sjå på ramma kring dei personlege historiene. I denne ramma møter vi Houellebecqs metafysiske side.

Denne sida er sjølvsagt ikkje ny, men bringar vidare det ein kunne kalle ei metafysisk vending som startar med behandlinga av islam i Underkastelse (2015) og kristendommen i Serotonin (2019). I Tilintetgjøre vert dette religiøse repertoaret utvida med okkultismen.

Terror og satanisme

Hovudpersonen ber det meiningstunge namnet Paul Raison, som seier noko om korleis han lever i spennet mellom fornuft (Raison) og kristendom/metafysikk (Paulus). Denne middelaldrande, einsame mannen dveler i ei ekteskapeleg krise som har vart i ti år, der han og kona Prudence lever lidenskapslaust ved sida av kvarandre som to framande.

Digital tilgang – heilt utan binding

Prøv ein månad for kr 49.
Deretter kr 199 per månad. Stopp når du vil.


Eller kjøp eit anna abonnement