Film
Ungdommar og andre dummingar
Trass i ei mangslungen oppskrift er hovudretten overraskande tam.
På den prestisjetunge skulen får ei gruppe elevar snudd både kosthaldet og livet på hovudet av ein nytilsett ernæringsfysiolog.
Foto: Another World Entertainment
Det er duka for eit nytt fag for utvalde elevar på ein rikmannsskule – «medvite kosthald». Inn for å undervisa kjem frøken Novak (Wasikowska). Nokre av elevane skil seg fort ut som særleg engasjerte, for ikkje å seia fullstendig opne for å dumpa både mat og familie for den store saka. For å seia det kort: det er noko djupt usunt over den kjernesunne frøken Novak og kjerneverdiane.
Blodklubb
Club Zero har element frå alt eg synest er skammeleg underhaldande i sannkrimsjangeren: lettpåverkelege folk som vert dregne inn i kultliknande miljø der maktovergrep er dømde til å skje. I starten føler eg meg treft av satiren (særleg etter sommaren og med grillkiloa som skal av) – dei unge menneska som listar opp kvifor dei vil ha eit meir medvite kosthald: klimakampen, dyrevelferd, konsumerisme, ta vare på kroppen.
Det er unekteleg noko hakkande gale med kosthaldet i den vestlege verda, så noko må gjerast. Men når den utolelege bortskjemde Elise kjeftar på faren som har laga grønsaklasagne for å gjera dottera til lags, og ho seier «veganisme er så ute», er det fort eit stikk til dei unge sitt strevsame jag etter nye trendar. Harselering med biohacking (å stagga aldring) og autofagi (sjølvnedbryting av celler) er treffande, særleg sidan desse ungdommane knapt har ei rynke eller eit gram overfløding feitt på kroppen.
U-kul hjelp
Motstanden kjem i hovudsak frå bekymra foreldre og eit par av dei mest sjølvtenkande elevane. Ikkje-rike Ben innrømmer at han berre er med for å få nok poeng til å få stipend, men som ein likar å seia i sannkrimsamanheng: Vil han drikka Kool-Aid-en til slutt?
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
