Under depresjonen i USA forlét familien Drinkard heimen i Georgia og drog til New Jersey, der Emily, som åttande barn, kom til verda. Som så mange i slekta hadde ho musikaliteten i gåve og song saman med Mahalia Jackson i The Drinkard Singers, som var første svarte gospelgruppe på eit storselskap med plateutgjeving i 1957.

Åtte år gammal blei Emily morlaus og flytta til ei eldre søster som var mor til Dee Dee og Dionne, seinare med etternamnet Warwick. Saman var dei bakgrunnsvokalistar på hundrevis av pop-, rhythm & blues- og soulinnspelingar i New York. I 1963 slo Dionne igjennom som soloartist, og Emily med artistnamnet Cissy overtok som leiar i gruppa. Same året fekk ho dottera Whitney med ektemannen John R. Houston jr.

Songgruppa blei til The Sweet Inspirations, og på innspelinga av Aretha Franklins Lady Soul i 1967 er dei uovervinnelege på «Chain of Fools» og «You Make Me Feel (Like A Natural Woman)». Gruppa spelte inn eigne album, og på det første kan ein høyre magiske «Sweet Inspiration». Sopranen til Cissy føregrip røysta til dottera, som døydde altfor ung.

Då Cissy Houston (91) døydde 7. oktober, måtte eg tenke på «Mother and Child Reunion», duetten hennar med Paul Simon.

Øyvind Pharo

Øyvind Pharo er litteraturvitar, musikkskribent og DJ.