TV-konserten til The Beatles på Ed Sullivan Show i 1964 var den største rock’n’roll-hendinga sidan Elvis i 1956. I april hadde The Beatles hatt dei første fem plassane på Billboards Hot 100, og dei toppa listene i 14 veker til Louis Armstrong vikarierte ei veke med nostalgiske «Hello Dolly!» frå Broadway-musikalen.

The Beatles kom snøgt tilbake på toppen med «Love Me Do», som dei hadde debutert med i England to år tidlegare. Låta har nesten same munnspelintro som «Hey! Baby!», ein av dei største internasjonale hitlåtane det året. Songaren Bruce Channel hadde den framtidige rootsstjerna Delbert McClinton på munnspel. Channel blei invitert til å spele i England med eit lokalt band, men han insisterte på å ha med McClinton, for han visste at munnspelet hans gjorde låta.

I Liverpool og badebyen New Brighton hadde dei to texanarane The Beatles som oppvarmingsband. «Love Me Do» var ikkje gitt ut enno, og Lennon var nysgjerrig på munnspelteknikken til McClinton. Han nektar for at han lærte Lennon noko som helst: «Eg viste han korleis eg spelte.» Derimot fortel han i biografien sin One of the Fortunate Few at 22-åringane blei gode vener, og Lennon viste han Liverpool by night. Det sette han nok pris på, den festglade munnspelaren.

Øyvind Pharo

Øyvind Pharo er litteraturvitar, musikkskribent og DJ.