Latin / Pop

Bad Bunny:

Debí tirar más fotos

Rimas

Bad Bunny var den mest strøymde artisten på Spotify i 2020–2022: Gjennomsnittsmennesket skal ha høyrt om lag to og ein tredjedels song av den puertoricanske artisten i 2022 åleine. Tittelen på det sjette albumet hans, Debí tirar más fotos, tyder «eg skulle ha tatt fleire bilde». I ein tilhøyrande kortfilm følgjer vi ein eldre herre som kjøper bakarvarer til ein talande frosk og mimrar om ei svunnen tid då bilane overdøyvde motorduren med dundrande subbass. Her står underlege møte mellom tradisjon og det moderne på menyen.

Plata går rett på sak. Gamle puertoricanske salsaopptak blir, nærast umerkeleg, til dundrande reggaeton, brutal trap og hurtig dembow før tredjesporet tar ein skarp svingom frå techno- til salsagolvet med «Baile inolvidable», ei feststemd sak med smak av latinjazz. Så berre byksar det vidare, fram og tilbake i det latin-karibiske musikklandskapet.

På reggaetonballaden «Perfumito nuevo» syng Bad Bunny duett med sin puertoricanske pop- og hiphopkollega RaiNao, og med den svulmande traphousehymnen «El clúb» er hjartesmerta bortimot total. Ein svimmel gitar vassar kringom på eit dansegolv overfløymd av Bad Bunnys tårer.

Stemninga tar seg opp att nokre spor seinare. Kvintetten Los Pleneros de la Cresta bidreg med folkeleg koring og ihuga traktering av puertoricanske perkusjonsinstrument som pandereta plenera og güícharo på «Café con ron».

Medan hanen gjel på «Lo que le pasó a Hawaii», er den knallharde låta «Eeo» heilt ko-ko, og til slutt blir det påfyll i salsaskåla med framifrå a cappella-rapp og festleg congassolo på «La mudanza». Konklusjon: Dette er spretne saker.

Rasmus Hungnes

er biletkunstnar, musikar og fast musikkmeldar i Dag og Tid.