Samtidsmusikk

Adrian Myhr Trio:

Kokong

Adrian Myhr, kontrabass; Jan Martin Gismervik, trommer, harmonium, perkusjon; Rasmus Kjorstad: fiolin, langeleik
Øra Fonogram

Kontrabassisten Adrian Myhr er kjend frå fleire konstellasjonar innan moderne jazz og folkemusikk, mellom anna Johan Lindvall trio, Kim Myhr og Harpreet Bansal. Når han presenterer den første plata under eige namn, er impulsane frå jazz og folkemusikk òg merkbare, men musikken er like mykje prega av minimalisme, og spelet er lågmælt og disiplinert. Det heile framstår som stramt strukturert kammermusikk, sjølv om einskilde parti verkar improviserte.

Av og til høyrer me enkle og fengande melodiar, av og til er det klangflater som dominerer, og rett som det er: små rytmiske figurar som vert repeterte og langsamt transformerte. Det er særleg Rasmus Kjorstads spel på fele og langeleik – med sine føreslag og ornament – som gjer at musikken av og til minner om folkemusikk. Men når jazzslagverkar Jan Martin Gismervik flyttar seg frå trommesettet og i staden spelar harmonium, vert dette inntrykket ytterlegare styrkt.

Sjølv om me veit at Kjorstad er ein veletablert utøvar av folkemusikk frå Gudbrandsdalen, og presseskrivet avslører at indisk og albansk musikk har vore inspirerande, er dette likevel ein musikk som står trygt på eigne bein, utan referansar til stilartar og geografiske plasseringar. Musikken er biletskapande og dreg tankane mot ukjende landskap.

Det er stadig meir utbreidd at musikarar insisterer på at dei ikkje bryr seg om etablerte stilartar og nektar å la seg plassera innan ein særskild sjanger. Ofte er det ein lettvint floskel, men Adrian Myhr Trio har makta å gjera dette på overtydande og heilstøypt vis.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.