Musikk
Musikken som veg i verda
Pianist og komponist «Blue» Gene Tyranny var ein særs kjenslevar og formidabel utøvar med ein omfattande produksjon.
«Blue» Gene Tyranny.
Pressefoto
Tyranny, eller Robert Nathan Sheff, som var det eigentlege namnet hans, spela med særs ulike musikalske personlegdomar, som til dømes multikunstnar Laurie Anderson, operafornyar Robert Ashley, jazzpianist Carla Bley og punkrockar Iggy Pop. I tillegg var han ein innovativ innspelingsteknikar for mellom andre komponisten John Cage.
Men det er ikkje fyrst og fremst ord som imponerande eller allsidig som festar seg i møte med Tyranny sitt kunstnarskap. Det er heller ei djupn, og ein heilskapeleg dedikasjon til eit liv vigd kunsten og musikken sine haldepunkt.
Eg oppdaga musikken til Tyranny gjennom eit langt intervju i den storarta samtaleboka Talking Music av William Duckworth for mange år sidan, og vart etter kvart nyfiken på musikken. Han er ikkje bunden til konvensjonelle tankar om sjanger og stil og inneheld alt frå musique concréte og frijazzimprovisasjonar til nydelege poplåtar og noterte verk for større ensemble. Komposisjonane har heile vegen ein tydeleg signatur frå Tyrannys uttrykk, arrangement og ulike måtar å gjere ting på.
Enormt spekter
«Blue» Gene Tyranny voks opp i San Antonio i Texas, ein stad kanskje meir kjend for tex-mex og countrymusikk enn avantgardistisk kunstmusikk, men også her fanst all slags ulike miljø, og dei gav også næring til Tyrannys enorme musikalske spekter. Han spelte i rockeband, danseband og bluesband, og han studerte klassisk piano og eksperimentell komposisjon ved sida av alt frå tidleg i tenåra.
Han vart ein del av miljøet kring Once-gruppa og -festivalen i Ann Arbor i åra 1961–1967, eit levande, framtidsretta kunst- og musikkmiljø, der han fekk presentera mykje av musikken sin, mellom anna for komponistar som Morton Feldman og John Cage. Frå 1971–1982 underviste han i musikkteori og komposisjon på Mills College i Oakland. Her utvikla han i tillegg studiofasilitetar med store høve til elektroniske eksperiment som gjorde at musikarar og komponistar kom tilreisande for å jobbe med han.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
