Jazz

Tomasz Stanko Quartet:

September Night

Tomasz Stanko, trompet; Marcin Wasilewski, piano; Slawomir Kurkiewicz, bass; Michal Miskiewicz, trommer. ECM

September Night er eit konsertopptak frå Unforeseen, eit symposium for improvisert musikk i München i 2004. To år tidlegare hadde Stanko gjeve ut den første plata med den polske kvartetten sin, Soul of Things (ECM). Plata blei byrjinga på eit av dei mest kreative kapitla i karrieren til Stanko. Konsertsamarbeidet mellom dei fire skreiv seg attende til 1993 og blei avslutta med ein konsert i Warszawa i 2017, året før Stanko døydde.

På plata finn ein sju originalkomposisjonar av Stanko. Det vil seia, den Corea-inspirerte «Kaetano» har dei fire skrive i lag. Låtane varierer i tempo, men også innanfor kvar låt koplar dei ettertenksame introar og improviserte parti med raske tempo.

Plata er først og fremst eit samanhengande prov på kva nivå kvartetten hadde løfta samspelet til. Eg veit ikkje kor mykje som er redigert vekk av den samla konserten, men musikken her er heilt utan kvileskjer. Spelet og samspelet er inspirert frå første til siste tone.

Det er vanskeleg å dra fram høgdepunkt frå ei plate som er sett saman av sju slike, men eg festa meg ved «Euforila» fordi det indirekte er ei hylling til Miles Davis anno 1970. At Stanko har vore inspirert av Miles på meir enn eitt vis, er velkjent, men på nemnde låt svevar også ånda til Herbie Hancock og Jack DeJohnette over vatna. Dette er ein kandidat til årets plate, spelt inn i Muffathalle i München for mest 20 år sidan.

Lars Mossefinn

Lars Mossefinn er frilans journalist og fast jazzmeldar i Dag og Tid.