Kriminalitet

Nina Riibe

Svein Gjerdåker stiller eit godt spørsmål i Dag og Tids leiar «Reell politisatsing» 11. oktober. Ei reell politisatsing bør bygga politiet til ein organisasjon som hindrar kriminalitet og ikkje berre spring etter kriminaliteten.

Økonomisk kriminalitet har auka i omfang. Pengar er rota til mykje av gatekriminaliteten. I praksis er politiet meir eller mindre makteslause til å etterforska og derfor stogga økonomisk kriminalitet. Kunnskapen i politiet og organiseringa av arbeidet er grunnar for at det er slik.

Politietterforsking blir stort sett gjord av dei med utdanning frå Politihøgskolen og politijuristar. Problemet er at for å forfylgja økonomisk kriminalitet trengs økonomisk og digital kunnskap. Det er ikkje spesialområda for politiutdanna eller juristar. At rett kompetanse er viktig, er heldigvis ikkje nytt for Stortinget. I Stortingsmelding 15 (2023–24): «Hvem som jobber med bekjempelse av økonomisk kriminalitet og hvilken kompetanse de har, betyr mye for om innsatsen gir uttelling.»

Det krev ein tydeleg og målretta arbeidsgjevar i justisministeren for å løysa utfordringa med å få fatt på høgkompetente innan IT og økonomi. Politiet må innovera og finna nye måtar å få fatt på kompetanse på. Viss ikkje blir det inga reell politisatsing der politiet har ein kompetent organisasjon som både spring etter og hindrar kriminalitet.

Nina Riibe er administrerande direktør i Econa.