Paul Larsson er professor ved Politihøgskolen og har forska på organisert kriminalitet og politiets metodebruk på feltet. Han er samd i at det trengst meir ressursar til både etterforsking, etterretning, analysearbeid og operativ innsats i arbeidet mot kriminelle nettverk og organisert kriminalitet generelt. Samstundes åtvarar han mot å hausse opp situasjonen rundt dei kriminelle nettverka i Noreg i dag.

– Eg skjønar at folk er alarmerte som følgje av det som skjer i Sverige, men det er ikkje store endringar i dei kriminelle nettverka i Noreg. Dette med at personar frå svenske nettverk opererer i Noreg, er heller ikkje nytt. At norske kriminelle og svenske kriminelle har kontakt og gjer jobbar for kvarandre, har gått føre seg i tiår. Og det betyr heller ikkje at svenske nettverk no kjem til å etablere seg i Noreg. Det ser eg tvert om som lite truleg, seier han.

– Men det er snakk om grovare og meir valdeleg kriminalitet frå nettverka no enn før?

– Det kan det sjølvsagt vere, men eg har ikkje sett studiar som kan dokumentere det. Eg har også vore i denne businessen lenge, og stort sett har endringar gått svært treigt.

– Samstundes, dersom svenskane for ti år sidan hadde visst kva dei veit i dag, ville dei kanskje gjort meir den gongen?

– Eg jobba i Sverige for ti år sidan, og den organiserte kriminaliteten i Sverige i dag ikkje er ny. Mykje av han har røter tilbake til 1980-talet. Det har òg vore skytingar og eit generelt høgare valdsnivå i nokre miljø i Sverige i meir enn 15 år, seier han.

– Så du ser ingen risiko for at vi skal få ei liknande utvikling?

– Nei. Det er to grunnleggjande hovudskilnader mellom Noreg og Sverige. For det fyrste har Sverige det politiet definerer som utsette område, kjenneteikna av sosial og økonomisk utanforskap og arbeidsløyse, der det er anslått at så mykje som seks prosent av befolkninga i Sverige bur. Det er mykje, nær 600 000 menneske. Det er ei klassisk oppskrift på område som skapar problem. Det andre er at nokre av dei kriminelle miljøa i Sverige har røter tilbake til 1980-talet. Det betyr at dei er godt etablerte både i lokalmiljøa i organisasjonslivet og til og med i næringslivet på visse område. Den typen integrasjon, og det at kriminelle miljø er så sterkt etablerte i samfunnet, har vi heller ingen kjende døme på i Noreg. Så Noreg er i ein heilt annan situasjon enn Sverige. Heilt klart, seier Larsson.