Litteratur

Jan H. Landro

jan.h.landro@gmail.com

Einmannsforlaget Guggolz Verlag i Berlin har mellom anna spesialisert seg på å gi ut klassikarar frå nordisk litteratur og gir no ut dei fire banda av Die Leute vom Hellemyr samla. Tre omsetjarar har arbeidd parallelt med bøkene, Christel Hildebrandt, Gabriele Haefs og Nora Pröfrock. Tidlegare har forlaget gitt ut Skrams Professor Hieronymus, som så å seie er den skjønnlitterære versjonen av hennar eigne røynsler som pasient i psykiatrien.

Det er ikkje første gong tyske lesarar får møte Skrams litterære figurar. I åra mellom 1895 og 1902, altså i forfattarens eiga levetid, kom ei rad av romanane hennar ut på tysk, også den vonde historia om slekta frå Hellemyren, då under tittelen Die Leute von Felsenmoor. For om lag tjue år sidan låg dette verket føre på fransk.

Nyss var forleggaren, Sebastian Guggolz, i Telemark for å få med seg 125-årsfeiringa for Tarjei Vesaas, som han også gir ut på tysk. På heimreisa la han turen om Bergen, der Skram-kjennaren Gunnar Staalesen tok han med på ei omvising i dei stroka der vi veit at den unge Amalie bevegde seg. Sjølv om den bergenske krimforfattaren ikkje har vore direkte involvert i utgivinga, har han innimellom svart på språkspørsmål frå omsetjarane. Alt i ein norsk romanserie frå 1880–90 åra er ikkje like lett å forstå i dag.