Liv laga i femti år
Berre dei største optimistane trudde at Nynorsk pressekontor var liv laga, men det var det.
Stortingsrepresentant og mangeårig styreleiar i NPK Osmund Faremo (i midten) saman med statssekretær Ulf Sand (t.v.) og forbrukar- og administrasjonsminister Odd Sagør (t.h.), alle frå Arbeidarpartiet, under ein stortingsdebatt om pressestøtta i 1974.
Foto: NTB scanpix
I år kan NPK feira femti år med god von om femti år til. I samband med jubileet har pressekontoret gjeve ut boka Meir på nynorsk til fleire, som har vore eit mål heilt frå starten.
«For somme av oss som var knytte til målrørsla, var det ein draum som vart oppfylt då dette kontoret kom», skreiv NRK-veteranen Herbjørn Sørebø då NPK fylte 25 år.
Byrjinga
I Noregs Mållag leika dei med tanken om eit slikt pressekontor i byrjinga av 1960-åra. Men så heldt Anton Beinset den store talen i Bondeungdomslaget i Oslo, og der la han fram tanken om å starta ei nynorsk vekeavis. Det vart ei stemning som på eit religiøst vekkingsmøte, og det vart berre vifta vekk då eg våga å nemna tanken om eit pressekontor med gode journalistar som kunne prega heile pressa. Dag og Tid vart sett i gang på eit så dårleg økonomisk grunnlag at det vart pengesorger frå første dag, og det skulle stortingsvedtak til for å få pressekontoret skipa, skreiv Sørebø.
Våren 1969 sende Noregs Mållag eit brev til Stortinget om opprettinga av eit nynorsk pressekontoret, og om hausten vart det løyvt 75.000 kroner. Det førte til at pressekontoret vart etablert 1. desember 1969 med setesdølen Aani Rysstad som redaktør. Han starta på berr bakke – utan kundar, medarbeidarar og distribusjonsapparat.
Det var tronge tider i starten og berre pengar til journalist i halv stilling, men i 1970 vart Helge Arild Bolstad den første fast tilsette journalisten.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
