Det spirer og gror i utvalet på Rema 1000. Kjeda som har fått delar av namnet sitt frå å tilby 1000 varer, har alt femdobla den målsetjinga og tilbyr no langt ifrå berre langtidshaldbare hyllevarer. Mellom anna finn eg no ei heil hylle med påsmurde bakarvarer og ferdigblanda salatar – lunsjmat, med andre ord, som ifylgje innpakninga skal vere både Raskt & Enkelt (det er merkenamnet) og Fersk og nylaget.

Brødprodukta inkluderer klassikarar som club sandwich, sandwich med egg og bacon og frøhorn med ost og skinke, og er produsert av frukt- og grønsakleverandøren Bama, som er 20 prosent eigd av Rema Industrier AS.

Det fyrste som slår meg, er bruken av ordet «fersk». For eg har sett haldbarstempelet på sida av pakninga: Eg veit ikkje kor lenge brødmaten har lege på kjøleskåpshylla, men eg veit ut frå siste forbruksdag at sandwichane kan vere til sals i fire og hornet i tre dagar til.

Om det kan ha sine fordelar i eit matsvinn- eller transportperspektiv, er det definitivt falsk marknadsføring: oppskore brød og loff er verken ferskt eller nylaga etter tre til fire dagar i ei butikkhylle. Sidan det ikkje står kva dag vara er produsert – noko som hadde vore uproblematisk å legge til på den same merkelappen – er det heller ikkje mogleg for kunden å finne ut kor gamal brødmaten er før ein kjøper han.

Grønsakprodusent

Det andre som slår meg, er likevel ein endå merkelegare mangel: Produsenten av brødvarene, Bama, er som eg så vidt har nemnt, fyrst og fremst produsent og leverandør av frukt, grønsaker og andre vegetabilske matvarer. Likevel er brødvarene nesten heilt frie for slike ingrediensar.

Ja, det er tomat i club sandwichen, men ikkje salat, slik ein vanlegvis forventar. Ein kunne tru det kom av den lange liggetida, men det er crispisalat i focacciaen med karrikylling. Saman med paprika er det einaste grønsak her. I sandwich med egg og bacon er det ikkje eitt einaste grønt innslag.

Og det sluttar ikkje der: I hylla over brødvarene ligg det salatar – også desse produserte av Bama for Rema, berre under merkenamnet Ferdig preppa – og også her er grønsaker nærast fråverande trass i at dei er nemnde i innhaldsoversikta på framsida av pakninga.

Er det verkeleg mogleg å lage salat utan grønsaker? Ja, om det ein lagar er pastasalat, er det tydelegvis det. Her har Bama – gjennom storkjøkkendotterselskapet Nordic Lunch AS – laga ein pastasalat med kylling og ost – og 7 prosent brokkolistilk og 3 prosent raudlauk. I pastasalaten med ost og skinke er 11 prosent plommetomat og 4 prosent purre dei grøne innslaga ein har funne plass til.

Klarar oss utan kjøt

Og kva er det vi får i staden? Kjøtprodukt som er så utspedde og tilarbeidde at dei knapt er til å kjenne att. Roastbiffen ligg i ein baguette med potetsalat og har i seg sjølv elleve ingrediensar – berre tre av dei, storfe-flatbiff, salt og krydder, burde ha noko der å gjere. Skinkene som er tilsette, er utan unntak laga på svinekjøt som er limt saman med hjelp av ei rekke tilsetjingsstoff.

Her bør vi ta oss tid og råd til å spørje kva det eigentleg er vi et – og om vi verkeleg treng dette her. Debatten om kjøtforbruk har hardna til etter at dei nordiske kosthaldsråda senka tilrådd grense for raudt kjøt til 350 gram i veka og ofte vert presentert som eit vere eller ikkje vere for norsk jordbruk. Så dramatisk treng det ikkje vere: Eit råd er eit råd, og mitt råd denne veka er at vi kan alle gjere litt – til dømes byrje med å kutte ut det kjøtet som eigentleg ikkje spelar særleg rolle.

Bama kunne gjere sin del av jobben ved å byte ut kjøt – som dei tydelegvis ikkje er særleg gode på – med det dei faktisk kan: grøne smakar, anten i naturleg form eller tilarbeidd til salatar, purear eller kaker. Nettsidene deira, som er stappfulle av gode oppskrifter, kan vere eit utgangspunkt om dei manglar idear.

Skal du ete noko her akkurat i dag, er truleg ein Burrito med Pulled Pork det reinaste valet. Her har kjøtet fått vere kjøt og fått selskap av både råkost av hovudkål og gulrot og ein grønkålmiks av ulike kål og rotvekstar. Men truleg ville eg heller stått over.

Siri Helle