Festspel er ikkje berre mørke salar og komplisert kunst. Festspela i Nord-Noreg er også gateliv med teater, ein togstasjon av papp og graffiti på vandring.

Det er ein kvalitet ved Festspela at dei maktar å gi liv til eit småbysentrum som treng liv og aktivitetar. Det er også viktig for den lokale forankringa.

Det starta med opningsframsyninga inne på verkstadområdet til Harstad skipsindustri. Etter at utanriksministeren hadde opna festen og snakka varmt om kunst og kultur i nord, fekk tilskodarane mannleg korsong og ballett frå dansarar i kjeledress. Harstad er ein tradisjonsrik verkstadby, og festspeldirektøren er opptatt av samspel med industri og næringsliv. Dansinga var noko langdryg, men det var tøft når den store heisekrana svinga rundt og helste festspelbyen. Og i bakgrunnen stråla det nye kontorbygget til Statoil, ei påminning om spenninga mellom industri og kultur.